ഈ ആപ്പുകൾ ഉപയോഗിച്ചിരുന്നവരാണോ? ഒന്നും രണ്ടുമല്ല, 101 എണ്ണം! ആപ്പിലാക്കുന്ന ‘പണി’ക്ക് ഗൂഗിളിന്റെ കടുത്ത നടപടി
സ്മാർട്ട്ഫോൺ ഉപയോക്താക്കളുടെ സ്വകാര്യ വിവരങ്ങൾ ചോർത്തിയതിനെ തുടർന്ന് നിരവധി ആപ്പുകൾ നീക്കം ചെയ്ത് ഗൂഗിൾ പ്ലേ സ്റ്റോർ. അടുത്തിടെ ചില ആൻഡ്രോയിഡ് ആപ്പുകൾ വഴി വിവരം ചോർന്നുവെന്ന് കണ്ടെത്തിയതിനെ തുടർന്നാണ് നീക്കം. സുരക്ഷാ ഗവേഷകരായ ഡോ. വെബാണ് സ്പൈ വെയറിനെ കണ്ടെത്തിയത്. നിരവധി ജനപ്രിയ ആപ്പുകളിൽ കടന്നു കൂടിയ സ്പിൻ ഓകെ (SpinOk) എന്ന സ്പൈവെയർ ഉപയോക്താക്കളുടെ ഉപകരണങ്ങളിൽ കടന്നുകയറി സ്റ്റോർ ചെയ്ത സ്വകാര്യ ഡാറ്റ ചോർത്തുകയും അവ വിദൂര സെർവറുകളിലേക്ക് അയയ്ക്കുകയും ചെയ്തുവെന്നാണ് കണ്ടെത്തിയത്.
ഗൂഗിൾ പ്ലേ സ്റ്റോറിൽ നിന്ന് ഡൗൺലോഡ് ചെയ്ത 101 ആൻഡ്രോയിഡ് ആപ്പുകളിൽ സ്പൈവെയർ കണ്ടെത്തിയതായി ഡോ. വെബ് അവകാശപ്പെടുന്നുണ്ട്. പ്ലേ സ്റ്റോറിൽ നിന്ന് മൊത്തം 421,290,300 തവണയായി ഡൗൺലോഡ് ചെയ്ത ആപ്പുകളിലാണ് പ്രശ്നം കണ്ടെത്തിയത്. ഉപയോക്താക്കളെ ആകർഷിക്കുന്നതിന്റെ ഭാഗമായി രസകരമായ സമ്മാനങ്ങൾ, ഗെയിമുകൾ, റിവാർഡുകൾ എന്നിവ നേടാനാകുന്ന തരത്തിലുള്ള രീതികൾ ഉൾപ്പെടുത്തിയാണ് ആപ്പുകളുടെ യൂസർ ഇന്റർഫേസുകൾ തയ്യാറാക്കിയിരിക്കുന്നത്.
ഇതിന്റെ മറവിലാണ് ഉപയോക്താക്കളുടെ പ്രവർത്തനങ്ങൾ സ്പൈവെയർ ട്രാക്ക് ചെയ്യുന്നത്. അത്തരം ആപ്പുകളെ ഗൂഗിൾ പ്ലേ സ്റ്റോറിൽ നിന്ന് നീക്കം ചെയ്തിട്ടുണ്ട്. ഉപയോക്താക്കൾക്ക് ഈ ആപ്പുകൾ ഫോണിലുണ്ടെങ്കിൽ ഒഴിവാക്കണമെന്ന നിർദേശവും നൽകിയിട്ടുണ്ട്. പ്ലേ സ്റ്റോർ നീക്കം ചെയ്ത ആപ്പുകളിൽ ഏറ്റവും കൂടുതൽ ഡൗൺലോഡ് ചെയ്തിരിക്കുന്ന നിരവധി ആപ്പുകളുണ്ട്. Noizz, Zapya,VFly, MVBit, Biugo, Crazy Drop, Cashzine, Fizzo Novel, CashEM, Tick, Vibe Tik, Mission Guru, Lucky Jackpot Pusher, Domino Master എന്നിവയാണ് അതിൽ ഏറ്റവും പ്രധാനപ്പെട്ടത്.
