പാലക്കാട് : അധ്യാപകനോട് കൊലവിളി നടത്തിയതില്‍ മാനസാന്തരമുണ്ടെന്ന് പ്ലസ് വണ്‍ വിദ്യാർത്ഥി. തൃത്താല പോലീസ് വിളിച്ചു വരുത്തിയപ്പോഴാണ് വിദ്യാർത്ഥി തന്റെ പിഴവ് തുറന്ന് പറഞ്ഞത്.ഫോണ്‍ വാങ്ങി വച്ച്‌ വഴക്ക് പറഞ്ഞതിന്റെ ദേഷ്യത്തില്‍ പറഞ്ഞു പോയതാണെന്നും ,പറഞ്ഞ കാര്യങ്ങള്‍ പിൻവലിച്ച്‌ മാപ്പ് പറയാൻ തയ്യാറാണെന്നും വിദ്യാർത്ഥി പോലീസിനോട് പറഞ്ഞു.
കൂടാതെ തനിക്ക് അതേ സ്കൂളില്‍ തുടർന്ന് പഠിക്കാൻ അവസരം നല്‍കാൻ പോലീസ് ഇടപെടണമെന്നും വിദ്യാർത്ഥി ആവശ്യപ്പെട്ടു. അതേസമയം വിദ്യാർത്ഥിയ്‌ക്കെതിരായ അധ്യാപകരുടെ പരാതിയില്‍ പ്രഥമാദൃഷ്ട്യാ കേസെടുക്കാനാകില്ലെന്ന് പോലീസ് പറഞ്ഞു.
ആനക്കര ഗവ. ഹയർ സെക്കൻഡറി സ്കൂളിലെ പ്ലസ് വണ്‍ വിദ്യാർത്ഥിയാണ് അധ്യാപകർക്കെതിരെ കൊലവിളി നടത്തിയത് . സംഭവത്തില്‍ അധ്യാപകർ തൃത്താല പോലീസില്‍ പരാതി നല്‍കിയിരുന്നു. സ്കൂളിന് പുറത്തിറങ്ങിയാല്‍ തീർക്കുമെന്നായിരുന്നു വിദ്യാർത്ഥി പറഞ്ഞിരുന്നത് . ഇതിന്റെ ദൃശ്യങ്ങളും സമൂഹമാദ്ധ്യമങ്ങളില്‍ പ്രചരിച്ചിരുന്നു.
സ്കൂളില്‍ മൊബൈല്‍ കൊണ്ടു വരാൻ വിലക്കുണ്ടായിട്ടും വിദ്യാർത്ഥി ഫോണുമായി വന്നതിനെ തുടർന്ന് അധ്യാപകർ ഫോണ്‍ വാങ്ങി വച്ചിരുന്നു. ഇതിന്റെ പേരില്‍ വിദ്യാർത്ഥി സ്കൂളില്‍ പ്രശ്നങ്ങളുണ്ടാക്കി.ഇതിനു പിന്നാലെയാണ് വിദ്യാർത്ഥിയെ പ്രഥമാദ്ധ്യാപകന്റെ മുറിയിലേയ്‌ക്ക് വിളിച്ചു വരുത്തിയത്. ഈ സമയത്താണ് വിദ്യാർത്ഥി കൊലവിളി മുഴക്കിയത്.
